_ أثيييير يلا قومي بسرعة الفان بيجي الحين

قمت بعد تفقد لساعتي

فكيت لفافات الشعر جعلهن الكسر ، ماعرفت أرقد بالليل

< كل هذا في سبيل شي بتعرفونه بعد شوي

لبست القميص وفوقه الجكيت الأسود

ومن ثم لبست التنورة السوداء < أو العكس والله اني مدري

جهزت دفتري حق الشسمة

بس كل هذا عشان شي

اليوم صرت أستاذة

اليوم أول ايام التطبيق الميداني ، الله يكفيكم شر حماسي المدري وش يبي

الشاهد انو الفان اللي بنركب معه جديد وراعيه جديد

تخيلو جالسة انتظر السيارة نص ساعة

ويوم جت ست ونص ركبت ، وبدأت مشاوير التخبط في البيوت

تخيلو وحدة من البنات اخطت بالتوصيف

رقينا كبري الخرج وتعديناه بشوي

همن عودنا للدلم

كل هذا يحدث بصمت

وأخيرا مسكنا خط الخرج الساعة 7 ونص

سمعنا السواق يتمتم بأشياء

فجأة قال ” الله يلعــ … خير أبو … يوم خلانا نشوف هالوجيه “

_ ترى اليوم وخلاص ” بعد ترجي انه يجيبنا لبيوتنا مثل ماودانا “

والله ان حالتنا صعبة وش طيحنا بهالسواق

يا إلهي وش سوينا ، منتب مجبور تودينا

وبعدين تراك بتاخذ حقك وزود

وأخيتكم جايها موجة ضحك عارمة

وذاك يزاعق

حسيته بيصطرني كف

بس بجد اشكالنا تضحك

أستاذات كذا تكون افتتاحيتنا

وأخيراً وصلنا للمدرسة والحصة الأولى بتخلص

عرفنا من قبل ان مديرة المدرسة قوية لدرجة مهب زينة

لهجتها في التعامل سيئة نوعا ما

مشينا نحن الأستاذات المتدربات _ سيكو

وتوجهنا لباب المديرة

طق طق طق طق

_ السلام عليكم

_ _ وعليكم السلام

_ _ عرفوني بنفسكم

_ فلانة من الدلم

” وكان غالبيتنا من الدلم “

_ _ الحين ليه جايين هنا ليه ماتروحون تداومون بكلية الدلم

< نبرتها جدية !

< ياناسو بالله هذا ترحيب

بدال ماتجلسنا وترحب فينا وتسوي لنا اجتماع صغير ،

على الأقل تعرفنا بالمدرسة

_ _ ارقوا الدرج وغرفة الفنية هي مكانكم

أنا هذا وجهي > !!!!! تعجبااات !

بالله وش خلانا نروح يمّــها

المهم رحنا فوق وتعرفنا على بنات الفيزياء كانوا معنا متدربات !

دخلت علينا الوكيلة ” المساعدة ”

وقفت جمبي بالتمام

بدت تقرأ علينا التعليمات من الورقة

وانا جمبها أهتز من الضحك

حسيتها مثل اللي يقرأ بيان من الديوان الملكي

وربي انها مثله مثل أسلوبه

طبعاً كانت كلها تحذيرات وممنوعات

ووقعنا على ثلاث تعهدات

الين جت الحصة الثانية ودخلنا كمشاهدة للدرس

الصف ثالث متوسط ” ج “ مادة التوحيد

والله ياذا الكحلي مغطي على المكان

جلسنا ، وفجأة بدأ الصراخ

” أنا أبله أنا أبله أنا أبله أنا أبله “

والله اني ماقدرت امسك نفسي

طشمت من الضحك

ياربي الله يعين اذا شرحت لهم بضحك بوجههم

والله ازعاج مهوب طبيعي

بس فيه بنات مهب زيون

أولاد مهب بنات الله يهديهم ويفتح على قلوبهم

خرجنا بعد كتمة دامت 45 دقيقة

استاذتنا المشرفة نقدت لنا الأستاذة بنقد كثير لكنه صحيح وبمحله

الله يستر علينا الأسبوع الجاي

وعدتنا تدخل علينا بأول حصة !

يعني مافيه امكانية تجربين التدريس قبل التقييم

ودي أصور لكم أشيائاتي

بس بعدين بالتدوينة الجاية ان شاالله < الله يعجل بها

يالله ابيكم كلكم حماس مثل يومي اللي كل ابوه رعب

يالله سلامووووووو عليكووووووم

لأرواحكم ( )

< الصورة صغر حجمها بقوة 

احفظوا الصورة بجهازكم ثم استعرضوها من هناك 

آ شسمه اليوم يومن مدهشن بالحيل صارت فيه عجايب جديدة

الحكاية بالطريدز

قمت من النوم تعبانة هالكة الصداع واللوز والزكام مجتمعات فوق راسي أحسهن كوابيس

من كثرهن

تخبرني شيخه ان مرضت يالله أتحرك من مكاني بس جيدتن في الونة

وماأحلم وأسولف بصوت عالي وأنا نايمة مثل رزان

ياهي تقص قصص اجرامية

وقسم ذاك اليوم قاعدة تهزأ بعبد الرحمن أخوي وهي نايمة

لا والثاني ذات مره سمعناه وهو نايم قاعد يقرأ قرآن

شكله شايل هم الحفظ

وهتون الثانية قاعدة تمشي وهي نايمة جيت بوجهها ابي احاسيها يمكن تقوم

وتستوعب نفسها عشان تصيح من الفشيلة مادريت الا واهي

تصفقني ذاك الكف وتضحك !

وقسم خبلة مدري وش تحس به

آ الشاهد اني على قمة تعبي اشتهيت ازين لعائلة ابوي عشا

< مناب قايلة عايلتي لأن السيد مابعد شرف لعندنا

لحظه ستوب

انا ازين عشا

ومن متى

حبي للنت يساوي كرهي للمطبخ عاد في المساعدة تطلع السناعة

بس اهو اذا وجد من يطبخ بدالي فضّلت أن ابقى بعيدة

والا اذا جا الجد أكيد بطلع أسنعكم < مدري ليه أحس أم رجلي بتقرأ تدوينتي هاذي عشان كذا

قلت بدافع عن نفسي شوي

آ المهم داهمت الجميع بهذا الخبر اللذيذ

وقررنا شد الرحال الى القلب جيان عشان يشترون طلبات العشا التعجيزية

< كنت ابي اشتري كيكة جلكسي والا ماتعمدت اصجهم عشان نشتري من جيان

فرد كيدي في نحري ومالقيت كيكتي اللي ابيها

فاصل _

منايري روحي لهم بكره يمكن يجيبون كيكتي المعشوقآه

آ وشريت لأمي شي ينقال هدية من هناك إير ويك ونعم الهدية

وشريت إلها مجلتها المعشوقآه مجلة عالم الغذا مدري الغذا

ياهي مخلصة لذا المجلة

أجل قد شفتوا أحد يشتري كل الأعداد همن يشتري كل المجلدات بنفس الأعداد القديمة

ابد هاذي أمي منيرة بنت عبد الرحمن بن عبد العزيز

< منايري يالكوشخة اسمس مثل امي يالقلودة

رجعنا للبيت الله يفتح على قلبي شكل موازيني منقلبة وأنا تعبانه أزين عشا الله يكفيكم الشر بس

عاد قررت أصلح نص الوجبة اليوم والنص الثاني بكره ويحمدون ربهم ويحببون يدياتهم بعد

مافضيت أزين الصحن لهم بلا بقدونس بلا شسمة

ان شاالله التزيين في النص الثاني

شسمة ابشركم تمّ تغيير الثيم لعل النفس تنفتح شوي

ولعلّي أمسك نفسي وأعود اكتب تدوينة جديدة ، شكلي بعض ثوبي وبهج مرةً أخرى

يالله فتكو بعافية < من يقول اني ملّيت من كابتشينو فطور البنات  ، أحد يشرب ويستصيغ الكابتشينو استغفر الله

ما بين اللحظة واللحظة هناك غيمة تشهق بجنون !

تشهق بالحنين ،  

تخيلاتي المستجدة حتى مطلع الأسبوع القادم مدارها الحنين والأمل

الدرك الأسفل من القلب سيصهر في ذلك اليوم  ” الأربعاء القادم “ 

لماذا الحنين بطاقة ممنوعة من الصرف ؟!

كلّي أمل بلقياكِ ،، 

^

^

التقاطه صبآح هذا اليوم لحقيبة أختي هتون < ياهي خاقتن عليها ذالهتون تسنها أول مرة تشتري شنطة

صباح ، مساء المطر والغيم .. للجميع

علمت أنّ صنعاء كانت ماطرة وغائمة في أجواء شاعرية .. تمنيت أن أكون هناك

المملكة جميلة هذه الأيام أيضاً

إلى الكل صباحكم ومساؤكم مطر وفرح ..

بس حبيت أقولكم اني افتتحت مقهى  

وهي ضمن اللوحآت الارشادية

يالله سلآم أشوفكم هنــآك ،

صباح / مساء الخيرات

اليوم موعد رحلتنا للعاصمة  

طبعا لأنه يوم غير دونت هاليومية هنا

كان الصبح بحمد ربي يجننن مليان غيوم

والريحة يالله من فضلك ريحة مطر

انفتحت معها جميع القنوات التنفسية

توليت مهمة تشغيل السيارة وصرت أقول نعم لقيادة المرأة طبعا بس في البر

وأخياتي كل وحده تناقز اللي تقول ودينا أبها والثانية تبي الشرقية أقرب لي  

وبصراحة خشيت جو معهم

وجربت كل أزرار السيارة

والكبوس بعد ماخليتها بحالها

وصلنا هناك تسع الا ربع

واستفتحنا بالعليا مول

على أساس الكل شرا له قماش وفصل لعرس الخال الا أمي  

وصوابعي مااستوعبتها الا وهي مصوره جوا هالمحل اللي شرت منه أمي قماش

فستانها بألفين وأربع

قهر غلا فاحش بس شالسواة الزين كله غالي

وبعد شرينا قماش فستان لأم المعرس ” جدتي حفظها الله “

تخبرن الهدية والمفاجأة الحلوة 

المهم قضينا من هالشغلات وجينا لتركيب العفش بالسيارة

الأخت الفاضلة ” شوشو “

ماقصرت معي أبدا البته  

اليكم المشهد:

بينما كنت مندمجة في رفع الأكياس لشنطة السيارة وسيارتنا من نوع جيب لاند كروزر

يعني اذا جيتو تصكون باب الشنطة تنزلونه على تحت

الشاهد انو شويشوه صكت الباب على راسي    ولكم أن تتخيلوا كتلة الحديد النازلة بقوة

على راسي  

ألم كتمته بصمت  

معليش ننسى بعد شوي  

،

صلينا ظهرا بمسجد أبو صدى

< التسمية من عندنا

حافظينه أكثر من ست سنين!

جيت بركب للسيارة بطريقة غير مرتبة

وطرا ا ا ا خ ياراسي  

التندة صكت راسي  

تعرفون وش قلت  

” أكره سيآراتك  ، ولاعمري سلمت منهن   ، دايم حوادث معهن طبعا عقب تحطيم

الأسنان والدهس والركبة وانكسار الأنف

الله لايعيدهن من سيارات

قال أبوي : مادرينا كان قلنا للي يصنعون يحطون بلاستيك

واسكت بعيون مليانة دموع بس ماطاحن

ألم موجع

وصلينا عقب بالراجحي وشريت عسكر يم لأصحاب الرحلة  

همن مادريت إلا علبة عسكريم مليان ومايع منكب على عبايتي كلها

تسبحت

تحسبوني رحيمة

صارخت على شبيهتي الين طلعت حرتي

ووه وانقضى نهار هذا اليوم

بص ~

الخميس  _  24 / 10 / 1429 هـ

عش بقلب محب ,

وابتسم بقلب محب ,

وسامح بقلب محب ,

” من تصويري “